Hana be horse, beautiful horse, now a mare
Ebe Sika wey dem dey bell am
Dat be de time wey she be baby horse, foal.
Dat time, hin master, de white man perh,
Wey fit dey ride am.
Now, she grow; she claim hin body
She get hin own stable
Ebe dat day wey dey name am
Hana de Great, some too fit bell am Great Hana,
But de name wey she dey check paaa be
Hana-G.
Ebe malapropism
Wey e sarng be personification give de metaphor
You mon sabi
Say Hana-G be morda for many.
Hmmm, dem no dey talk-ooo,
Dem say dem no dey talk,
But me dier, e be ma pidgin wey adey speak
Ano dey search trouble, but ano dey dodge truf too.
Hana-G be beautiful horse, kaama!
De star for hin peers
She be de standard give him siblings before-before
Amean say from de very beginning.
But you see, no be say adey fraid talk-oo
Hmmm, make I whisper am give you alone.
More riders wey dey ride Hana-G noh,
Dem be monkeys, abi you know dat film
But dis one no be film!
Forest monkeys, savannah monkeys:
One perh no correct for dema inside.
Why Hana-G go dey huorng for dis time?
Wey she dey owe too-oo.
Wene horse get tins pas wana Hana-G?
De stable inside she dey sarf,
Check de sides den de ground say you no go spy gold,
Bauxite, diamond den tins?
Wey de sunshine too-erh?
De stable dey near sea den lakes den rivers
But Hana-G pikings, horse pikings dey terst.
Aaaba!
Check Hana-G hin children dema inside
One sarf chop world horses dema Class-P before
One sarf fit calculate how horses go fit jump
Go de air inside wey dem go land correct-correct.
E get de formula.
Pshhhhhh. No put me for trouble-oo.
As for Sports?
Make you no talk.
Ano dey yorb you people-ooo.
But Hana-G now dey look dirty, haggard den cadaverous kraa
Hana-G grow wey she mon dey rest now
She be 60-plus.
But de riders wey dey ride am noh,….
You want make a talk again?
Some dema behaviour pass monkey
Wey dey trow-trow money.
Oh! Mother Hana-G Horse
God has indeed blessed you
Blessed are you among horses.
